Запечен спанаќ со мелено месо
Состојки
- 250 грама мелено месо
- 500 грама спанаќ
- 1 шоља за млеко ориз
- 1 помала главица кромид
- 1 морков
- зачини по вкус и потреба сол, црн пипер, мешан зачин, малку нане, црвен пипер
- 2 лажици павлака
- 1 филџан јогурт
Подготовка
Најпрво се чисти спанаќот, убаво се мие и сецка (не многу ситно), се става во тенџере да се обари. Во меѓувреме, исецканиот кромид и изренданиот морков се ставаат во тава да се пржат. Откако ќе омекнат, се става меленото месо и се ставаат зачините. Откако месото ќе потемни, се додава оризот и уште малку се промешува.
Доколку има повеќе вода во тенџерето со спанаќ, се одзема и се става во друг сад. Испржените состојки од тавата се ставаат во тенџерето со спанаќ, убаво се меша и потоа се претура во тава за печење.
Ако е потребно уште вода за да се свари оризот може да се додаде одземената вода од тенџерето во која се вареше спанаќот.
По желба може да се додаде и една лажица брашно за да биде погусто и се размешува во тавата.
Спанаќот со меленото месо и ориз се пече на 250 степени, 30-тина минути.
Матиме 1 јајце заедно со две лажици павлака и 1 филџан јогурт. 5-10 минути пред да биде испечен спанаќот, тавата се вади од рерната, се прелива со смесата од јајце, павлака и јогурт и повторно се враќа во рерната преливот да фати кора.
Со јадењето може да има јогурт или павлака како прилог, но не мора затоа што преливот му дава шмек на спанаќот.