Топла салата од леќа и ориз
Состојки
- 190 гр леќа
- 150 гр ориз
- 1 главица кромид (средно голема)
- 3 чешниња лук
- 1 лажица мешан сув зачин
- 1/2 лажиче црн бибер
- 50на мл масло
- по потреба сол
- вода во сооднос со оризот 1-4 (колку зафатнина ориз во една чаша, 4 пати толку вода)
Подготовка
Салатава е феноменална!
Рецепт на Елена Младеновска, девојката која ја донесе на манифестацијата Храна без месо во рамките на овогодинашниот Бит Фест, а мене ми остави најголем впечаток од сета изложена храна. Со нејзина дозвола и на мое огромно задоволство, повелете рецептот, малку прилагоден во количините на мој начин и од моја гледна точка = )
Најпрво леќата малку сварете ја. Зависно од типот, некои 10на минути, при што ќе внимавате да бидат зрната цели.
Потоа кромидот ситно насецкајте го, а лукот најситно или поминете го низ алатка. Ставете ги на масло да се пропржат, па додадете го оризот исто така и тој малку да се пропржи.
Најлете ја водата и додадете ја леќата и зачинете. Варете на среден оган додека оризот се свари и испари течноста, повремено мешајќи. На крај ако има потреба посолете. Во зависност од тоа колку се осеќа лукот, а треба да има една мала дискретна нота миризба на него, додадете мааалку лук во прав.
Салатата служете ја топла. Таква е најубава.
Во прилог го доставувам и оригиналниот рецепт-
400 гр леќа
400 гр ориз
1 мала главица кромид
2-3 чешниња лук
Мешан зачин, сол, масло
Тука се препорачува соодносот ориз-вода да е 1-2, што мене некако многу недоволно ми се виде. Тоа сепак, зависи веројатно и од типот на ориз и неговата способност за впивање, но тука е и леќата...па...