Зинати фаци
Состојки
- 4 чаши брашно
- 1 лажичка сув, инстант квасец
- 1 лажичка сол
- 1 лажичка шеќер
- 1 жолчка
- 1 лажица маслиново масло
- 1 лажица маст или маргарин, путер
- 1 чаша млеко
- 1 чаша вода
- *** уште
- семки- од лен, просо... мак, чурек, ким...(тоа што имате, сакате)
Подготовка
Овој рецепт, го посветувам на денот на шегата 1 ви април : )
Додека го затоплувате млекото и водата, ставете го брашното во сад за месење и измешајте го со квасецот, шеќерот и солта. Додадете ги уште маслото, маста и жолчката и со течноста замесете тесто.
Оставете го да се дуплира. Премесете и оставете го уште 15 мин. покриено на топло.
Потоа, поделете го на 10 дела, кои ќе ги формирате во топчиња.
Секое топче, расукајте го во должина и со помош на тапа засечете ги очите, а со нешто поголемо, како на пример чашка за ракија, устата.
Делот кај устата оптегнете го на долу, а можи и на криво малку за да е зинато. Парчињата од очите се ставаат како уши, а од устата како нос.
Пред да ја ставите првата тава, почекајте рерната да се загрее на 200 степени. За тоа време премачкајте ги со белка и направете им коса од семките, па и мустаќи ако имате желба ; )
Печете ги околу 10 мин. одприлика.