Таљатели со спанаќ и сланина
Состојки
- 400 гр таљатели или други тестенини
- За сос
- 1 главица кромид
- 1 чешне лук
- 175 гр месната чадена сланина
- 300 гр спанаќ
- 250 мл кисела павлака
- 1 лажичка густин
- по вкус сол, бибер, морско оревче
- малку Ворчестер сос
- За одозгора
- 200 гр мек кашкавал
Подготовка
Сварете ја тестенината во обилно количество посолена вода, исплакнете ја со ладна вода, исцедете ја и оставете ја на страна.
Во средно големо тавче истопете една лажица путер, па додајте ја сланината исечена на ситни коцки и запржете ја малку да порумени. Додајте ги ситно исецканите кромид и лук и пропржете додека да се застакли. Додајте го крупно исечениот исчистен спанаќ, промешајте да завени, додајте 1/3 шоља вода и варете на средно тивок оган десетина минути. Посолете и побиберете, додајте и малку рендано морско оревче ако сакате.
Лажичката густин измешајте ја со павлаката да нема грутчина, додајте ја во спанаќот, измешајте и оставете да проврие и да се згусти. Додајте малку Ворчестер сос, дотерајте го вкусот и ако е прегусто разредете го сосот со малку вода.
Загрејте ја рерната на 200Ц.
Правоаголен керамички сад за печење лесно намастете го. Распоредете ги по дното тестенините, одозгора прелијте го сосот, па распоредете ги плочките мек кашкавал.
Запечете кратко, десетина минути да се зарумени.