Турте
Состојки
- 1 чаша=250 мл
- 1 кг брашно
- 1 чаша млеко
- 1/2 чаша масло
- 2 чаши шеќер
- 1 ванила шеќер
- 1 прашок за печење (пециво)
- 1 лажиче сода бикарбона
- 1 кора од лимон
- 3 јајца
Подготовка
Просејте го брашното во подлабок сад за месење, во кое предходно сте ги измешале пецивото и содата.
Направете вдлабнатина и во брашното ставете ги скршените јајца, шеќерот, маслото, млекото, ванилата и кората од лимон и се убаво измесете.
Тавата добро намастете ја и потоа побрашнете и по дното и по страните и префрлете го измесеното тесто. Тестото во главно доаѓа меко и добро се расплескува, израмнува со раце. Користете тава бр. 28 или 30.
Со помош на една или 2 вилушки направете шарки по желба и одозгора украсете со бомбончиња по желба. Овдека се употребени бони-топ.
Печете на 160- 180 степени, додека добро не се испечи. Проверете со притисок на рака или чачкалица.
Јас откако го направив во тавата, касно се сетив. Сега, по модерно убаво е и во калапи за мафини да се печи, (Ете, можеби како и многу пати оваа идеја ќе послужи некому за некој сличен рецепт), бидејќи поводот за правење Турте е првото запче кај бебињата и тоа се сечи на парчиња, најчесто коцки, се реди во послужавник и се дели на блиските. А тие пак, откако ќе земат, оставаат железни парички за да се цврсти забите и ориз за да бидат бели.