Карамелизиран ванила крем, малку поинаков

Подготовка

Ќе го нејдете со име Creme brulee и Французите к'е тврдат дека е нивни десeрт, Шпанците го викаат Crema Catalana и велат дека тие први го направиле во 18 век, а пак Англичаните биле уште побрзи и од 17 век го викаат Trinity Cream. Чиј да е, еден е од омилените десерти во мојата куќа.

Загрејте ја рерната на 150 Ц
На дното на еден поголем сад за печење ставете кујнска крпа и врз неа наредете ги порцеланските модли за печење, 4 - 6 зависно колку се големи.
Во едно мало тенџерче слатката павлака, маскарпоне сирењето и ванилата загрејте ги мешајки додека не е хомогено и не стигне скоро до вриење. Тргнете на страна и измешајте го изренданиот ѓумбир. Ако немате свеж, ставете 1/4 лажичка во прав, ама не е исто.
Жолчките изматете ги со кафеавиот шеќер додека не добиете светла и густа пена. Постепено додавајте од врелата млечна смеса постојано матејки за да не се згрутчат жолчките. Кога е добро измешано, процедете и распоредете ја смесата во порцеланските калапи. Во садот за печење сипете врела вода до висина на половина од калапчината и ставете да се пече на средина на рерната.

Печете го кремот 25 - 30 мин, готов е кога средината е уште е малку лабава, затоа внимавајте да не го препечете.
Извадете ги калапчината од садот за печење, оладете ги на собна температура и оставете ги во фрижидер барем 1 час.
Непосредно пред послужување, посипете го кремот со по 1 лажица кафеав шеќер и изгорете ја површината со бренер за храна додека не се карамелизира. Ако немате бренер ставете го кремот на некоја минута под грил грејачот во рерната.
Послужете веднаш.