Тортата ја направив со голема љубов и желба за прекрасен и хармоничен живот на двајца заљубени млади. Мојот 200-ти рецепт, воедно го посветувам на ќерката Марија и зетот Владо.
Полека, но сигурно еве стигнав до оваа бројка. Ми беше големо задоволство да готвам, украсувам, сликам и пишувам рецепти. Некогаш беше често, но некогаш требаше сама да се натерам да напишам рецепт, бидејки имам безброј слики сликано. Сликањето ми стана опсесија.
Голема благодарност до цела екипа на МР што ни овозможивте да се дружиме, да ги објавуваме нашите рецепти и да научиме многу нови работи. Благодарам и на вас девојки, за сите коментари и критики и секако за сите ваши рецепти. Се надевам дека рецептот ќе ви се допадне, па ќе се дружиме и понатаму.
Најпрво да кажам дека немам пресек од тортата, бидејќи бевме во гужва. Имам фотографии кои се сликани од мобилен апарат, но со мала резолуција.
Ви го пренесувам оригиналниот рецептот за шнит торта, Јас ја правев дупло од двете теста. Значи се прави темно тесто се сечи на два дела по должина. Од белото тесто се прави 1 пандишпан. Се става белото тесто на средината од тепсијата да биде широко колку ширината од едното пресечено тесто.

Темно тесто 
1. Се матат јајцата со шеќерот да се добие густина. Потоа се додаваат оревите кои се измешани со брашното и ренданото чоколадо. Ова се печи во долг плех. Ако се прави шнит торта ова тесто се сечи на два дела по должина.

Бело тесто 
2. Се матат белките со постепено додавање на шеќер. Потоа се додава сувото грозје и оревите. Се меша полека со лажица. На крајот се додава брашното.

Фил 
3. Жолчките се мешаат со шеќерот и нишестето и се додава во млекото. Се вари како пудинг. Се лади. Се става рендана кора од лимон. Настрана се мати маргаринот со шеќерот и се меша со филот.

Начин на редење
Се реди прво темното тесто. Се полива со 2 лажици млеко. Се става половина од филот. Потоа се става белото тесто кое се печи во должина во големина на половина плех. Ова тесто не се полива со млеко. Се реди другата половина од филот. Најгоре темното тесто.
Ако ставате фондан мора да има путер крем (100гр путер или маргарин со 100гр прав шеќер) се премачкува во тенок слој за да се залепи фонданот. Инаку се става шлаг или стопена чоколада.

Фондан 
Желатинот се прелива со вода и се остава да набабри. Фруктозата се става во длабоко тенџерче и се прелива исто со вода. Се става на рингла да се растопи фруктозата. Цело време се меша до почетокот на вриење. По 30 секунди, се трга од рингла и се додава 1 лажица глицерин и набабрениот желатин. Се меша.
Во вангла се става 600 гр шеќер во прав, потоа постепено се додава растопениот шеќер и се меша со лажица. Повремено се додава уште шеќер во прав, а потоа се префрла на работната површина со остатокот на шеќерот и се меси фонданот.
Најбитно е рацете да се измијат со вода и исушат добро .Убаво се меси и се остава да се ола 30минути на површината каде сте го месиле,а потоа да го ставите во затворена кеса и да се цува на собна температура. Најдобро е да се искористи наредните 2-3 дена зошто тогаш најдобро се работи со него или да го чувате 1 месец само на собна темпертура во прозирна фолија. Никако во фрижидер.

П.С. Глицеринот го има во аптека. Го користам за сите свечености.
- Фруктозата го има во големите маркети. Може да се искористи за 3 торти.
- Златна боја ја растварам со 2 капки вода и со четче го бојам фонданот. Може и да се измеша во фонданот, но вака ми беше побрзо.
- Фонданот може да се јаде, вкусен е.

Фотографиите во овој рецепт се авторски фотографии.

Лиценца: Сите права се задржани