Прекрасен кремаст сладолед, право летно уживање...јајцата му даваат кремавост (нема остаток од белки), белото чоколадо и балсамираните јагоди посебен шмек, а павлаката го освежува.

Подготовка
1. Јајцата малку се разматуваат со шеќерот се додава 1/2л млако млеко и се варат на тивок оган со постојано мешање додека не се позгуснат. Кремот не е густ како пудинг, туку благо треба да се задржува на позадината на лажицата (откако убаво ќе се загрее тоа е околу 5-7 мин варење)
2. На страна се растопува чоколадата со останатите 100мл. млеко, се додава во готовиот крем заедно со ванилата и смесата се остава да се олади на собна температура. Од време на време промешувајте ја за да не ви се фати коричка.
3. Јагодите се сечкаат на покрупни парчиња, се мешаат со шеќерот и балсамираниот оцет и се ставаат во рерна на 170Ц околу 20-30мин.
4. Балсамираниот оцет и шеќерот само ја надополнуваат аромата на јагодите, значи неговиот вкус нема да преовладува туку само му дава прекрасен шмек на сладоледот.
5. Оставете ги јагодите да се оладат и потоа испасирајте ги со рачен миксер. Според вкус, може убаво да ги испасирате и да ги поминете преку ситна цедилка за да добиете мазна смеса без семки. Јас сакав да се гледаат парченца, па само малку ги испасирав.
6. Во оладениот крем се додава павлаката, се разматува и смесата се става во фрижидер убаво да се олади.
7. После овој чекор ако имате апарат за сладолед, смесата ја ставате во него и ја оставате согласно инструкциите да се згусне. Потоа го додавате пирето од јагоди, вниметелно промешувате и сладоледот го оставате во замрзнувач за целосно да се замрзне.
8. Доколку немате ваков апарат, смесата ставете ја веднаш во замрзнувач, но вадете ја 2-3 пати на секои 1,5-2ч и поминете ја со рачен миксер, за да се спречи создавање на кристали и сладоледот да биде покремаст. На крај додадете го пирето од јагоди и оставете го сладоледот целосно да се замрзне.
9. Послужете ги топките сладолед прелеани со растопено бело чоколадо и уживајте во вкусот.

Фотографиите во овој рецепт се авторски фотографии.

Лиценца: Сите права се задржани