За мојата прва торта со фондан се одлучив токму за овој рецепт. И тоа не случајно...тортата е доста висока и токму висината и дава посебна убавина кога е покриена и украсена со фондан. Е сега, за оние кои се поспретни во работа со фондан, сигурно од тортава можат да направат вистинска убавица. А вкусот е прекрасен.

Најпрво подгответе го гријажот. Оревите ставете ги на хартија за печење. Шеќерот стопете го на умерена температура и со него налејте ги оревите. Оставете 10-тина минути да се зацврсти па потоа сомелете го. Ако и вие како и јас немате моќен сецко, тогаш проследете ја следнава постапка - скршете го гријажот на поголеми парчиња, ставете во кеса за замрзнување и иситнете го со чук најдобро што можете. Така иситнет ставете го во сецко и домелете го.

Подготовка на корите
Загрејте ја рерната на 180 степени.
Белките изматете ги во цврст снег, притоа додавајте го постепено шеќерот. Додадете ги жолчките една по една при тоа секоја жолчка матете ја половина минута пред да ја додадете наредната. Ставете го брашното и пецивото, изматете кратко и на крај додадете го гријажот. Убаво спојте ги состојките и ставете на хартија за печење во подмачкано тавче бр.26 да се пече некои 20-25 мин. Направете проба со чепкалка за да видите дали тестото е печено.

Откако се испекло, превртетего на кујнска крпа и извадете ја хартијата. Откако тестото ќе се излади, пресечете го на половина во должина.

На ист начин подгответе уште едно вакво тесто. Ќе добиете 4 кори.

Подготовка на филот
Во еден дел од млекото растворете ги пудинзите. Во остатокот од млеко ставете го шеќерот и ставете да се вари. Откако ќе зоврие, додадете ги пудинзите и сварете ги. Тргнете на страна, врз површината ставете стреч фолија и оставете целосно да се излади.
Путерот изматете го пенасто. Додадете го во изладениот пудинг, убаво изматете па ставете го останатиот гријаж.

Филувајте ги корите.

На крај украсете по желба со шлаг пена или фондан.
Доколку украсувате со фондан, тортата премачкајте ја со крем од путер, рецепт имам поставено тука. Јас користев готов, купен фондан, но на странава има многу рецепти за подготовка на истиот.

Фотографиите во овој рецепт се авторски фотографии.

Лиценца: Сите права се задржани