Тортава е вака грандиозна по повод роденденот на мајка ми. Пребарувајќи по интернетот интересни рецепти, како на овој сајт така и на многу други, пронајдов еден куп убави и вкусни тортички. Тешко ми беше да се одлучам за една (најдобра помеѓу најдобрите), па решив да ја вметнам помеѓу една друга комбинација. Сакав да го пробам за првпат и вкусот на бурбон ванилата, па искористив и такви пудинзи. Исто така, за разлика од претходните подготовки на торти, ставав помалку маргарин во филовите, па така станаа покремасти. Едноставно експериментирав, а добив нешто совршено и на изглед и на вкус. Се надевам ќе ви се допадне и вам.
1. За подготовка на првите два пандишпани, се матат белките со шеќерот, оцетот и ванилата, да се добие бела цврста маса, па се додаваат останатите состојки, се меша убаво, се истура во намрсен плех и се пече 15 мин. на 180 степени. Пандишпаните се оставаат да се изладат прво во плехот и потоа внимателно се вадат и се тргаат на страна на крпа да стојат додека да се подготват филовите (јас така направив бидејќи имав на располагање само еден плех во истата големина).
2. За третиот пандишпан јајцата, ванилата и шеќерот се матат со миксер, да запенат, се додава водата и потоа се останато. Се меша убаво и се пече во истиот плех како претходните два пандишпани 15-20 мин. на 180 степени. Се остава да се излади, па се вади од плехот.
3. 550 мл. од млекото за првиот фил ставаме на оган. Го додаваме шеќерот и оставаме да зоврие.
4. Жолчките, 100 мл. млеко и пудинзите се матат со миксер, па се додаваат во веќе зовриеното млеко. Се вари густ пудинг, се покрива со крпа и се остава на ладно место да се излади околу час и половина со повремено мешање.
5. По истата постапка се спрема и вториот крем, само овојпат се ставаат пудинзи од чиста ванила.
6. Во два различни сада се мати по 180 гр. маргарин, пенесто, и лажица по лажица се додаваат пудинзите – во едниот сад бурбон, а во другиот чистата ванила.
7. За подготовка на третиот фил, 350 мл. млеко ставаме да зоврие заедно со шеќерот на оган, а во 150 мл. ги раствораме пудинзите. Се вари густ пудинг и се остава да се излади.
8. Слатката павлака се мати во сад на страна најцврсто што се може.
9. Маргаринот се мати во друг сад на страна и му се додава пудингот лажица по лажица, да се добие убав, цврст крем, во кој што се додава изматената слатка павлака. Кратко се проматува со миксер и тој фил се дели на два дела. Во едниот се става бел еурокрем, во другиот црн и чоколадни капки. Повторно двата фила кратко се проматуваат со миксер и сега ги имаме конечните.
10. Тортата се филува по следниот редослед –
11. Најдолу оди еден од двата идентични пандишпани. Над него оди целиот фил од чиста ванила. Над филот вториот идентичен пандишпан. Над него филот со бурбон ванила. Над него третиот пандишпан и над него поделениот фил (може да се филува лажица по лажица или да се измеша филувајќи.
12. Шлагот се мати со млекото/водата, најцврсто што се може и целата торта се премачкува и се наросува со украсни трошки. Се става во фрижидер најмалку 3 часа пред послужување, иако најдобро е да престои цела ноќ.
Добар апетит!

Фотографиите во овој рецепт се авторски фотографии.

Лиценца: Криејтив Комонс - Наведи извор - Некомерцијално - Сподели под исти услови